السلام عليكم ورحمة الله وبركاته
أعزائى المستمعين واعزائى المشاهدين
انقل إليكم الخبر التالى من إذاعة الواحة للبث الهوائى المباشر والغير مباشر مرئى وسمعى وبصرى
بجد وحشتونى كلكم جدا فردا فردا ... وافتقدكم جدا جدا ...
اليومين دول زى ما تقولوا انى فى قمة الشغل بتاعى وهو الناتج الأخير من الكورس اللى بقالى 6 شهور بدرس فيه وهو مشروع التخرج اللى انا بصدد العمل فيه الآن ان شاء الله ... وطبعا اللى عمل مشروع تخرج من قبل او وضع فى هذا الموقف يعرف ان الوقت قليل جدا لاننا بنحتاج نقرى كمية كتب ومعلومات كتيرة جدا وممكن المشروع نكون هنستخدم فيه تكنولوجيا اخرى فنحتاج اننا نتعلمها بانفسنا بدون اى instractor يشرحها لنا ...
عشان كده انا هغيب لمدة 3 اشهر الى 4 اشهر اللى جايين ان شاء الله عشان اتفرغ للمشروع بتاعنا لانى بجد نفسى اعمل شىء كويس ولانه برده هيثبت عندى معلومات جمعتها فى خلال ست اشهر .. وطبعا السهر وكوبايات الشاى هتكون ملزمانى دايما لمدى 4 اشهر
وربنا يعين يارب
بس هدخل اما متابع او مشارك على حسب اى وقت فراغ هيكون عندى فى اى يوم .. او راحة مثلا ... وممكن ايام اخد اجازة كاملة واقعد على قلبكم هنا فى المنتدى
الله اعلم باللى هيحصل .. بس بجد هتوحشونى جدا جدا ...
ده بالنسبة لأول نقطة ...
أما تانى نقطة واللى هتكلم فيها معاكم .. وهى إننا نستغل الوقت الفاضى اللى بيبقى عندنا فى بعض الاحيان .. والفكرة اللى عندى هطرحها عليكم دلوقتى عشان يبقى استغلال امثل لينا كلنا إن شاء الله ...
انا حاليا بدرس تصميم مواقع طبعا مع دراسة ويندوز ابليكشن ... لاقيت إن تصميم المواقع يناسب جميع العقليات ومش محتاج لعقليات مفكرة أوى او انها شىء صعب اوى او انها شىء رخم فى تعليمه ..
عشان كده إن شاء الله قررت اننا كلنا هنشترك فى عمل موقع عن الرسول الكريم صلى الله عليه وسلم .. ويكون بلغات متعددة .. مش باللغة العربية يعنى .. وكل شخص متمكن فى لغة هيترجم ولازم يكون متمكن من اللغة جدا او يستعين باحد متمكن عشان المعانى ممكن تختلف من كلمة لكلمة ... وطبعا هيكون فى حذر شديد فى النقطة ديه ... الفكرة تتلخص اننا هنصمم موقع ستاتيك او ديناميك على حسب ما هنوصل ليه فى التعلم إن شاء الله ويكون باللغة العربية ونجمع فيه كل الداتا اللى شايفين انها ضرورية فى الموقع ... وبعد كده نشتغل فى ترجمة الصفحات مثلا انجليزية وفرنسية وايطالية ... إلخ ...
لانى وجدت ان موقع الرسول عليه الصلاة والسلام اللى موجود حاليا بيطلب مبلغ مالى للترجمة وبالطبع مافيش حد هيدفع عشان يطلع على الموقع (واقصد من الغرب) يعنى مافيش افادة زى اللى احنا مبتغينها ...
بالنسبة لنقطة الترجمة لازم اللى يترجم اما يستعين بأحد متصل باللغة ويعرف كل شىء عنها عشان يعرف يوصل معانى الجمل والكلمات زى اللى مقصود منها .. لان فيه كلمات بتوضع وممكن توصل معنى اخر ...
طبعا العمل ده ممكن يخلص فى سنين وممكن يخلص فى شهور .. بس المهم إننا هنشتغل فيه ابتغاء مرضات الله ... وثانيا هنحاول نشجع بعض دايما .. وحتى لو مش كمل يكفينا شرف المحاولة وهنبقى اتعلمنا حاجات برده ... بس فى النهاية ان نوايانا هتكون حسنة إن شاء الله ...
بالنسبة للمشروع كله ... انا وظيفتى إنى هعلم كل اللى ما يعرفش من البداية وهبدأ معاكم دروس فى تصميم صفحات النت وهبقى المرشد ليكم لحد ما توصلوا ان شاء الله فى النهاية إلى مرحلة الإحتراف .. والوقت معانا كتير ومش لازم نتعلم فى شهر او اتنين او عشرة .. المهم اننا نتعلم واهو الوقت كتير معانا فى النت ... وبعد ما تتعلموا ان شاء الله هقسم عليكم الشغل بمعنى ناس هتجمع داتا .. وناس هتحط افكار لشكل الموقع .. وناس هتنفذ الاكواد والكتابة وغيره ... والحاجات ديه كلها سهلة جدا على فكرة بس عايزة اللى يقعد ويدرسها بس ...
وإن شاء الله يكون فيه الخير والبركة واقدر افيدكم بشىء ولو بسيط وفى النهاية ننتج عمل خالص لوجه الله ...
اللى عايز يبدأ معايا يكتب اسمه هنا وانه مستعد إن شاء الله واذا كان عنده خلفية عن انشاء صفحات نت باى لغة ام لا ... وإن شاء الله فى خلال كام يوم انا حضرت انا واصحابى مشروع صغير وهو موقع تعليم الكلام ده والشرح احنا اللى كاتبينه يعنى كلام طلاب يعنى مفهوم افضل من الكلام الاكاديمى ان شاء الله ويكون سهل ان شاء الله هنرفعه على سيرفر وهنزله على الواحة برده إن شاء الله ويكون تحت ايد الجميع واتمنى ان الجميع يستفاد منه ...
نقطة التعليم ديه محدش يحمل هم فيها ... والشرح هيكون ميسر واى اسئلة هكون معاكم إن شاء الله .. الأهم هو المتابعة لان اى شىء خاص بالمواضيع ديه بمجرد هجرانه لمدة كل شىء بيتنسى .. حتى لو كنت بروفيشنال
يلا انتظر ارائكم وتسجيل اسمائكم إن شاء الله .. واى اسئلة انا فى الخدمة .. وزى ما قولت انا هبدأ معاكم ان شاء الله المتابعة والشرح بعد مشروع تخرجى اى بعد 4 شهور .. والموقع اللى هرفعه ليكم إن شاء الله تتعلموا منه بيسر وهبقى متابع اى اسئلة حد فى فترة ال 4 شهور دول ...
وأتمنى الموفقية للجميع إن شاء الله
وعذراً على الإطالة
أخوكم المشاكس
29-06-2008
صـــدمة الأربعــــة أشهـــــر 
