اسمها شهد .... خطبت قبل 3 اسابيع لابن عمها .. لم تكن تضع في خططها الزواج فالطريق امامها طويل .. تريد اكمال دراستها وووو من خطط البنات
خطببت ...وبناءا على رغبة والدها وافقت
فابن عمها الكل يقول بانه يحبها مع انها لا تحس بالحب يغزو قلبها
ولكن قالت لم لاأخطب له .. لنجرب
فامي لم تكن تعرف والدي وقد تزوجته واحبته بعد الزواج
ولكن اين هذا الخطيب ؟؟؟ 3 اسابيع ولم اراه او اسمع صوته ؟؟ كيف سأحبه ؟؟ وكيف سيتبادر الشعور الى قلبي بانه يحبني ؟؟ أمعقول بأنه مسافر ؟؟ او انه مريض ؟؟؟
احسن شيء ... سأتصل بزوجة عمي لاكلمها واستقصي عن اخباره :
صوت الهاتف يرن ... ترن . ترن .. وصوت زوجة عمي على الطرف الاخر
شهد : السلام عليكم شحالج عمتي
زوجة عمها : ياهلا والله بالغالية حبيبة القلب وينج يمة من وقت ماسمعناج تتصلين او تسألين .. وينج ياغلاي
شهد :: ضحكة طويلة ... اممممممممم حقج علي يالغالية انا اسفة وراسج ببوسها افا وانا عندي كم عمة حلوة شراتج
زوجة العم : تغلبيني دوم وتخليني اسكت باسلوبج الحلو .. لكن وينج يمة ليش ماتيين بيتنا وتسالين عني
شهد : مشغولة بالدراسة عمتيه .. انزين اذا انا ماسألت .... انتوا اتصلوا
صمتت قليلا ثم قالت ..
عمتيه ابتخبرج شحال سلطان ؟؟؟ وينه فيه ؟؟
زوجة العم : بخير يالغلا ... ليش انتي ماتشوفينه او تتصلون فبعض ؟
شهد : ماخبي عليج من يوم الملجة ماشفته ولا اتصل فيني وقلت يمكن مسافر ؟
زوجة العم : لا مسافر ولا شي .. وهذا هو عيب وليدي .. حياته كلها شغل وبس .. اعذريه يابنيتي واذا انتي شاطرة علميه شلون يهد الشغل ويجابلج .
شهد : الحينة هو وين ....في الشركة ؟
زوجة العم : هيه يمة .
شهد : انزين عمتيه ابسترخص وان شالله بييج في اقرب فرصة .. فمان الله
زوجة العم : في حفظ الرحمن يمة
ساذهب اليه حيث مكتبه واساله .. لم كل هذا الجفا .. اين انا من قلبه .. لم لا يتصل بي .
شهد : يبة عن اذنك بظهر شوي
الوالد : وين يبه ؟
شهد : بسير عند سلطان ... بروح الشركة ابي اشوفه
الوالد : خبر يديد عليي يبه ... خير ؟ فيه شي ؟
شهد : ابي اشوف سلطان واتطمن عليه .. فيها شي
الوالد : لا يبه حلالج ...
وصلت شهد الى الشركة وهناك قابلت السكرتيرة
شهد : مرحبا
السكرتيرة : يا اهلين وسهلين بالانسة شهد كيفك
شهد : بخير ربي يسلمج ... ابي اشوف سلطان .... مشغول ولا شنو ؟؟
السكرتيرة : لا .. مو مشغول ... عن اذنك بقول له انك هون
شهد : لا فديتج ابي اسوي له مفاجأة
السكرتيرة : ياعيني على الرومانسية
شهد دخلت الى مكتب سلطان الذي كان يقرأ في الأوراق ولم ينتبه لدخولها .. اخذت تمشي الى ان وصلت الى حافة المكتب وكل هذا وسلطان غارق في العمل لا يحس بمن دخلت المكتب
شهد : كح كح ... تريد سلطان ان ينتبه لها
سلطان لم يرفع راسه وقد اعتقد بانها السكرتيرة
سلطان : ها منى عندج شي اذا المعاملة اخلصت حطيها وروحي
شهد قالت في نفسها حتى السكرتيرة مطالع ويها ... شنو صنفك انت من الرياييل
شهد : سلطان لو سمحت ارفع راسك شوي وطالعني
سلطان تفاجأ ...
وقال : منووووو شهد؟؟ انتي هنية ... من متى ؟؟؟
شهد : مدري والله اسألك روحك .. اذا تحس بروحك ؟
سلطان : ليش ياية المكتب ؟ شو تبي ؟
شهد : ياية اخذ حسنة منك ؟
سلطان : تبين فلوس ؟
شهد : ابي شي اغلى من البيزات يا سلطان ؟
سلطان : غالي والطلب رخيص شو تبي بييبه لج الحينة قبل باجر
شهد : ابي احجي وياك ؟
سلطان : شو ياية هنية علشان تحجين معي ؟؟ بس هني مكان عمل .. مكتب ناس داخلة وظاهرة ...
سيري البيت وانا يايج .. واللي تبيه بيتم
"شهد ما عيبها اسلوب سلطان "
شهد : شرايك اطقني احسن ؟
سلطان : شو فيج ... ياية تتهاوشين ؟
شهد : اترياك اليوم المغرب وان ماييت لي حجي ثاني وياك ... وبقول لك المغرب يعني المغرب
سلطان : شو هالاسلوب يا ست شهد ... انزين بيصير خير بالسلامة
المغرب :
لبست شهد عباءتها وشيلتها وانتظرت سلطان كي يأتي وبالفعل جاء في وقته المحدد
سلطان : شو بتظهرين ؟
شهد : لأ ... انا بترياك
سلطان : تتريني بالشيلة والعباية
شهد : عيل شلون تبي تشوفني ياولد العم
سلطان : انتي حرمتي ... شو فيج .. من الصبح اسلوبج ماعيبني ؟
شهد : بامارة شنو انا حرمتك ؟ بامارة 3 اسابيع ماشفتك ولا رفعت التليفون من بعد الملجة ليش .... ليش ؟
اذا انت ماتبيني ... ليش تعقد قراني ... مو حرام عليك...
سلطان : كنت مشغول وايد وعندي شغل متراكم
شهد : ههههههههههااااااي شغل اوكي يابو البزنس وانا مابي اناقشك انا بعد عندي دراسة وايدة ... بس ابي منك شي واحد
سلطان : امري انا ييت اليوم ابي اسمعج
شهد : ابيك اطلقني .. انت ماتنفع لي ... ولا انا اصلح لك
سلطان : شو انتي تخبلتي ؟
شهد :انت تزوجتني لانك من صغرك أناني تحب التملك وكل شي حلو تبيه لك ... انت تبيني من ضمن مقتنياتك .. تبي لوحة تبروزها وتحطها على اليدار
وانا ماحب انتهي على اليدار ماحب الطواف ....
باجر ابي ورقتي ... ياولد العم
سلطان يسمعها وهو متفاجأ .... انتي ينيتي ؟؟؟
بكون مينونة لو بكون حرمة واحد شراتك ... انا مابيك
سلطان : والله لو بتموتين ماطلقج يالمغرورة وبحطم انفج يالشهد ...
شهد : ماعندك وقت لتحطيم الانف ... خلي التحطم لغيرك يابوالبزنس وطلقني انا مابيك
وقامت من عنده وهي تصارخ وقالت له ... باجر يابو البزنس ابي اورقتي
اليوم الثاني :
جاءت لشهد ورقة فيها :
حبيبتي انا اسف ماقدر اطلقج ... لكن اوعدج اني اتغير واهتم فيج ... فانتي اغلى شي املكه ...وبفقدانج افقد الروح وشلون لو الشهد فارقني ... يابعد روح سلطان
احبج
استانست شهد ... لان سلطان بها الخطوة ... سيخطو بنفسه الى مرمى حياة اخرى
حياة الشهد والسلطنة
وانا بعد احبك ياسلطان وكان ضروري اقسى عليك باسلوبي ... بس ترى هذا من ورا قلبي
من فيض قلمي فتقبلوه
سلمى
13-08-2007
لا تلم قلبا تعذب من جفاك- بقلمي 
ئه قبل فوات الاوان
..